ميلك شيك بالجالكسي

كوبين حليب سايل بارد و اصبعين كاكاو جالكسي ساده مقطعه  وملعقتين بودره كاكاو او بودره جالكسي ومن 4-5 سكوبات ايسكريم فانيلا ومكعبات ثلج ونضربهم بالخلاط وتزيين بالكريما والتوفي 

والكريمه( كريمه خفق مع ملعقتين سكر بودر  او كوب حليب سايل مع ظرفين دريم ويب بودر  بالخلاط لين يثقل) او استخدمي الكريمه الجاهزه من الجمعيه مثل كريمه بيتي كروكر او باسكن روبنز

انا ضاعفت الكميه

كيكه اللافا( كيكه البركان) ...

 

تسوين خليط بيتي كروكر بالشوكلا الجاهز وتصبينه بقالب له فتحه بالنص وبعد ماتخلص خليها ربع ساعه تبرد واطلعينها من القالب وتكبرين الفتحه اللي بالنص واللي يزود من الكيكه خليه داخل يصير مثل القاعده للصوص 

وتصبين الصوص الابيض ثم الصوص الكاكاو وزينيه مالتيزر وفليك او اللي تبينه

الصوص الابيض: جبن فيلادلفيا ( 200) جرام مع 6 ملاعق سكر بودر مع نص كوب كريمه خفق وملعقه صغيره فانيلا 

صوص الكاكاو: 5 جالكسي كبير مع نص قالب زبده بحمام مائي او ميكروويف ثم 2 قيمر( قشطه) صغير مع 3 ملاعق هيرشي الحبيبات.. فعلا صوصات لذيذه وحلاتها حاره

كيكه الجبن بالخضار، وسميتها كيكه البيتزا

 حطي بخلاط الكيك او مولازم خلاط بالمضراب اليدوي او السباتولا الكميات التاليه وباستخدام الكوب المعياري وبحراره الغرفه

( 3 بيض مع  نص ملعقه صغيره خل + ملعقه صغيره ملح وملعقه صغيره سكر + كوب حليب سايل ونص كوب زيت زيتون +ملعقه كبيره حبه سوداء + ملعقه كبيره بيكنج بودر+ ونص ملعقه صغيره بيكربونات الصودا + رشه فلفل اسود واحمر + كوب فلفل بارد 

ملون + نص كوب بصل اخضر + كوب زيتون اسود واخضر + كوب نقانق مقطع دوائر + كوب جبن شيدر او موزريلا مبشور + نص كوب جزر مبشور + كوبين طحين منخول 

وتوضع في قالب كيك مدهون ومرشوش طحين او ممكن عمله علي طريقه كب كيك ويرش زعتر وسماق ويدخل فرن لمده  30-40 دقيقه درجه 180 وللتاكد من نضجها وضع عود اسنان بالمنتصف 

حلا السنيكرز

 

الطبقه الاولى : كب كيك فانيلا او باوند كيك  اوممكن بسكوت دايجستف تغمسينه بحليب وتقطعينه وتوزعينه باكواب ( كاسات) التقديم

الطبقه الثانيه؛ ظرف دريم ويب واحد + 8 حبات كيري+ قيمر ( قشطه) 250 جرام اخلطيهم وكل كاسه ملعقتين كبار من الخليط فوق الطبقه الاولى

الطبقه الثالثه؛ 4 كاكاو سنيكرز كبير + قيمر( قشطه) صغير مع ملعقه زبده ودخليهم ميكروويف او حمام مائي ووزعي على الطبقه الثانيه ملعقتين من الصوص وزينيه سنيكرز

حلقوم الميني كب كيك

 

اسوي شيره : نخلط 4 كوب سكر مع كوب ونص ماء وعصير نص ليمونه ويحرك ليذوب السكر ثم على النار ويترك يغلي ويكثف شوي 

في وعاء ثاني نضع كوب ونص نشا و3 اكواب ماء ويحرك ليذوب النشا ثم على النار علشان يثقل ، ثم نرفع النشا عن النار ونضيف له الشيره شوي شوي ونحرك بالمضرب اليدوي  حتى يتجانس ثم يوضع على النار ويحرك قليلا ثم تخفف النار وتترك ساعه حتى ينضج ويغلظ وخلال هالساعه كل شوي حركي و ضيفي ملعقه او ملعقتين ماي ورد وممكن مكسرات  وتقدرين تلونينه بالوان الطعام ومنكهات الليمون او الفراوله ووزعيه بقوالب الكب كيك تكون مدهونه زيت ومرشوشه نشا او قالب عادي اذا تبينه على شكل مكعبات وخليه بالثلاجه 24 ساعه وطلعيه من القالب وحطيه بكيس فيه نشا وسكر بودر وحركي الكيس علشان يغطي الحلقوم وزينيه بالورد المحمدي

قهوه المالتيزر

احب انوع بالقهوه، جربوها لذيذه فعلا

كوب حليب سايل مع ملعقه نسكافيه ونص كوب ماي وملعقتين قيمر( قشطه) وكيسين مالتيزر ثم سخنيه على النار وراح تذوب حبات المالتيزر لين يغلي ، جهزي الاكواب وضعي بكل كوب ملعقه من كريمه مخفوقه ( كريمه خفق 250 جرام مع ملعقتين سكر بودر بالخلاط لين تصير كثيفه) ثم تصبين القهوه فوقها وراح تكون رغوه كثيفه على الوجه ووزعي حبات مالتيزر فوق الرغوه 👌

المسقعه اللذيذه

بصينيه الفرن توزعين شرايح البطاط المقليه وفوقها شرايح الباذنجان المقليه ثم دجاج مسلوق ومسحب من العظم وتوزعينه علي المقالي ثم حمسه بصل وثوم  وفلفل رومي مقصص صغير وطماط مقصص صغير ومعجون طماط وبهارج وماجي وشويه ماي وخليه يتسبك وصبيها فوق الدجاج  ثم الطبقه الاخيره صوص من :  تضربين بالخلاط قيمر حجم كبير وثلاث ملاعق طعام جبن سايل ووزعي جبن الموزريلا ودخليها الفرن تحمر 

محلبيه قمر الدين

الطبقه الاولي: محلبيه بيضاء

٤ كوب حليب سايل 

٦ م.ك نشا

٦ الى .١م.ك سكر ( والسكر تقدرين تختارين اقل او اكثر ) 

اخلطي المكونات وخليه علي النار وحركي بالملعقه  لين تحسينه بيثقل وخلي النار هاديه لين يثقل ووزعيه بصحون ودخليه الثلاجه يبرد

الطبقه الثانيه؛ محلبيه المانجا

٤ كوب شراب  قمر الدين

٦م.ك نشا

٦الي .١ م.ك ( السكر اختياري اكثر او اقل)

واخلطيهم وعلي النار حركي بالملعقه لين يثقل وصبيه علي الطبقه الاولي ودخليه الثلاجه

المرقوق بطريقتي

تحمسين بصل وثوم بزيت ثم الدجاج او اللحم اللي متوفر عندج ، وخليه شوي يحمس عدل ورشيه ماي اذا نشف وبعدين الخضروات( بطاط وقرع وجزر وفلفل رومي ) مقصص مربعات كبار نفس ماتسوين لج مرقه واصبري عليه شوي ثم شويه بهار وماجي وفلفل اسود ولومي ثم الطماطم ومعجون الطماطم مع شويه ماي وخليه يتسبك ويتطعم عدل وبعدين حطي ماي مغلي نفس ماتسوين مرقه لين يطبخ وينضج ولاتنسين الملح ثم خبز الصاج المقطع تضيفينه للمرقه وحركي واضربيه  بالملعقه الخشب لين يندمج الكل ويكون القوام وسط بياخذ مع الخبز تقريبا ربع ساعه وعوافي مقدما

شيش طاووق

صدور دجاج مقطعه مكعبات ونتبلها : بروب واحد و عصير ليمونتين وشويه خل واثنين فص ثوم وملح وشويه سماق وملعقه صوص الصويا وملعقه دبس رمان وملعقتين معجون طماطم وبهارات وتخلينه في الثلاجه علي الاقل ساعتين ويفضل الليل كله 

تنقع اعواد الشواء الخشب في الماء لمده ساعه علشان ماتحترق ثم نشك قطع الدجاج بالاعواد والبصل والطماطم والفلفل بالاعواد 

وتصفينها علي بايركس فيه ماي وادخلينه الفرن للشوي من تحت وفوق وتقلبينها للجهه الثانيه .... طعم ورائحه جميله والتتبيله كل ماطول فيها بيكون لين وبسرعه يستوي

سلطه الفواكه🍊🍏🍎🍉🍇🍒🍌

من: رمان وفراوله وتفاح احمر واخضر وموز وعنب وبرتقال وخوخ ورقي واي فاكهه تحبينها ... والعصير مانجا وبرتقال

صينيه الارز بالشعيريه وحمسه الجزر

شعيريه نحمسها بزيت  تحمر ثم صبي ماي وكل ما احتاجت  ماي زيدي وخليها لين تستوي وينشف مايها ودجاجه تقطع اربع قطع وتسلق بماي ثم تشوينها بالفرن ( حطي عليها معجون طماطم وصويا ودبس رمان وليمون وزيت وملح وبهار) بس خليها تحمر  وتاخذين قدر وتحطين فيه سمن مع بهارات عدله( فلفل اسود وقرنفل ودارسين وهيل) وخليه لين تطلع ريحه البهار وحطي الارز بعد ماصفيتيه من الماي تحمسينه شوي وصبي عليه ماي الدجاج المسلوق وبعدين تحمسين شرايح بصل بسمن مع بهار وملح ثم جزر مبشور وبزاليا ثم ضيفي الشعيريه اللي حمستيها وعلى نار هاديه  ثم تاخذين صينيه الفرن وتحطين طبقه ارز ثم شويه من حمسه الشعيريه ثم الدجاج المحمر ثم الارز واخر شي حمسه الشعيريه وتقصدرينه وادخلينه الفرن شوي علشان الطعم يكون الذ 

كيكه بلاك فورست ( الغابه السوداء) black forest cake

سوي خليط الكيك الجاهز بيتي كروكر بالكاكاو وصبيهم بقالبين كيك ودخليها الفرن 

 ولما تخلص خليها تبرد وكل كيكه قصيها بالنص ويصير عندك اربع كيكات 

 اخفقي 2 كريمه خفق مع 4 ملاعق طعام سكر بودر بخفاق كهربائي على درجة عالية حتى تتكون كريمة ثقيله. 

- ضعي وحده من الكيكات وادهنيها بالكريمه  ثم ضعي توبينغ الكرز فوقه ( علب جاهزه بالجمعيات)  ضعي الطبقة الثانية من الكيك ثم الكريمه ثم توبينغ الكرز  وهكذا واخر طبقه 

- ادهني جوانب وسطح  الكيكه بالكريمة ، وابرشي كاكاو ووزعيه على جوانب الكيكه وسطح الكيكه وزينيها بالكريمه والكرز

حلا بيض القطا

 .. 

تخلطين كوب ونص طحين مع نص كوب حليب سائل مع قالب زبده لينه( 100جرام) وتعجن لين تصبح عندك عجينه طريه وتغطى نص ساعه ترتاح ، ثم تقطع العجينه الى كرات صغيره الحجم ثم تحشى بحشوه الجوز ( نص كوب جوز مفروم خشن مع نص ملعقه صغيره هيل ونص ملعقه كبيره ماي ورد ونص ملعقه كبيره سكر بودر) باستخدام ملعقه الشاي وتشكل على هيئه بيضه صغيره ثم تقلى بالزيت الحار وخلي النار وسط واتركيها تبرد وتنشف من الزيت  ثم ضعيها في كيس فيه سكر بودر وغطيها بالسكر وقدميها

وعيدكم مبارك 

معمول التمر والمكسرات

نخفق بملعقه 2  اصبع زبده لينه ( 100جم لكل اصبع)  + 1/4كوب سكر بودر + بيضه حتى نحصل على خليط كريمي ثم نضيف ملعقتين كبار نشا  ثم ملعقه صغيره بيكنج بودر + 1/2 ملعقه صغيره فانيلا ثم نضيف 1/4 2 كوب طحين 

ثم تعجن ونستخدم قوالب المعمول في تشكيلها وسويت نوعين من الحشوه شي تمر مع جبن كيري والحشوه الثانيه ( جوز ولوز وفستق مفرومه فرم خشن مع سكر وشويه ماء ورد)  بعدين دخليه فرن حار من تحت النار لمده عشر دقائق او تحمر من تحت  ثم ولعي النار من فوق تحمر شوي وتترك تبرد ثم تقدم 

حلا الغريبه

نخفق بملعقه 2 زبده ( 100جم) لينه + 1/2 كوب سكر بودر + بيضه حتى نحصل على خليط كريمي ثم نضيف كوب نشا ثم 1/2 ملعقه صغيره بيكنج بودر + 1/2 ملعقه صغيره فانيلا ثم نضيف 2 كوب طحين 

ثم عمل كور منها مع الضغط الخفيف عليها ووضع شريحه فستق في الوسط وتدخل الفرن  من تحت النار لمده عشر دقائق او تحمر من تحت وتترك تبرد ثم تقدم 

سلطه الناتشوز

تخلطين شرايح خس وملفوف وذره وبطاطس ناتشوز مكسرته بيدك والصوص عباره عن : عصير ليمون وخل وملح وثومه مدقوقه ومايونيز وصلصه فرنسيه جاهزه ماركه MF

@mffood 

طاجين الدجاج مع الزيتون

تحمسين بصل وثوم بشويه زيت ذره وزيت زيتون علي نار هاديه   وضيفي بهار ( كمون وكاري  وورق غار وشويه دارسين وزنجبيل مبشور وفلفل اسود واحمر وزعفران ) ثم ضيفي طرشي ليمون( ليمون مخلل) واذا ماعندك طرشي ، ليمون مقصص شرايح وشويه معجون طماطم ثم ارجل دجاج ( متبلتها بليمون وملح وفلفل اسود ) وخليه يحمر شوي ثم جزر صغير وبطاطس مقطع شرايح ثم كوب ماء ونص وخليه علي نار هاديه لين ينضج الدجاج والخضار وتكون المرقه كثيفه ثم ضيفي كزبره مفرومه ونص كوب زيتون لمده ربع ساعه ثم يقدم 

اصابع الجبن

ترق شريحه البف باستري وتقسم الي ثلاث قطع وكل قطعه  تحطين فيها شريحه من جبن موزريلا او قشقوان مقطعه بشكل طولي وضعيف وتلفين عليها البف باستري وتغمسينها بيض ثم بقسماط وكرري الطريقه مرتين او ثلاث بيض ثم بقسماط ودخليه الفريزر  يجمد واذا تبين تقلينه خليه برا نص ساعه و تكون نار غزيره وحاره

عصير الرمان

🍎🍷🍷🍎

4 كوب سفن اب مع كوب من شراب الرمان المركز مع ثلج وحبات رمانه واضربيها بالخلاط

رمضان كله عصاير بارده منعشه😃

كرات البطاطس

2 بطاطس وسط تسلقينه وتهرسينه وتبلينه ملح وفلفل اسود وكمون وصوص الخردل( مسترد)  ونص كوب موزريلا مبشوره وتعجن مع بعض وتشكلين البطاط كور صغيره وتحطينها بطحين ثم تغمسينها بيض ثم بقسماط ثم تكررين تغمسينها بيض ثم بقسماط ثم الفريزر علشان يتماسك ثم يقلى بزيت غزير وساخن

الروب ( الزبادي)

4 اكواب ماء مع 2 كوب حليب بودر نخلطهم مع بعض ونخليهم على النار حتى تدفأ ( بدون غليان) ثم ترفع عن النار ونضيف لها علبه روب( زبادي) وتخلط وتغطي وتترك بمكان دافئ الليل كله ، خليه 9  الى 12 ساعه واذا تبينه اكثر حموضه خليه وقت اطول  وبعدين دخليه الثلاجه يبرد 

دجاج كنتاكي البيتوتي وسلطه كنتاكي

 

دجاجه تقطعينها ثمان قطع او تشترين الجاهز اللي بالجمعيات مقطع وتغسلينه واتبلينه كاري وكمون وكركم وسماق وثوم وعصير ليمون وتخلينها بالثلاجه ساعه وبعدين تسلقينها نص سلقه وبعدين تغمسينها بخلطه كنتاكي( كوب حليب سايل وبيضه  وكوب طحين وشويه فلفل اسود واوريجانو وملح وكركم وثوم وملعقه صغيره بيكنج  بودر مضروبه بالخلاط) ثم بالبقسماط او الكورن فليكس المجروش وخليه بالفريزر نص ساعه وبعدين اقليها بزيت غزير حار واذا قليتيها خلي النار وسط 

سلطه كنتاكي ( كول سلو)

ربع ملفوفه وسط( كرنب) مقصص صغير مع فلفل بارد وجزر واحده  وبصله صغيره مقصصه صغار تخلطين الخضار وتصبين عليهم الصوص: مايونيز وعصير ليمون وثمان ملاعق كبار خل واربع ملاعق كبار سكر( قابل للزياده) وزيت زيتون 

عرايس اللحم والحلوم

👌حلوم تبشرينه وتخلطين معاه طماطم مقصص صغار وزعتر وشرايح زيتون ونعناع بودر وليمون وزيت زيتون وثومه مدقوقه 

👌نحمس بمقلاه فيها زيت او سمنه بصل مفروم  ناعم ثم  اللحم المفروم  مع بهارج وملح  لين تستوي ثم ضيفي البقدونس المفروم و ربع كوب من الصنوبر المحمر( اختياري)  و نطفي النار و نضيف ربع كوب دبس الرمان ونخلي الحشوه تبرد شوي

وبعدين ناخذ خبز لبناني وتقطعينها اربع قطع 

وتحشين الخبز بالحشوه وتدهنينها من برا بزيت زيتون وتنحط بالشوايه لين تحمر