الجمعة، 25 أكتوبر 2013

حلا التوست بحليب الزعفران وماي الورد

 حلا التوست بحليب الزعفران وماي الورد
يقطع التوست الى دوائر او الشكل اللي تبينه ثم نضعها في كاسات التقديم او قوالب القصدير ثم نضيف ملعقه من خليط ( قيمر وسكر ومكسرات او فستق مطحون) ثم تغطى بطبقه ثانيه من التوست 
على النار نضع كوبين حليب سائل مع ملعقه ماء ورد وهيل وزعفران وسكر ونخليه لين يغلى  ثم نصبه على التوست ودخليه الثلاجه يبرد  ويقدم بارد ويزيين بالفستق 



بوريك تركي سبانخ بالجبن👌


كل ثلاث شرائح جلاش تدهن ثم ثلاث اخرين وتكرر الطبقات للشريحه التاسعه ثم وضع الحشوه وتوزع جيدا ثم تغطى بثلاث شرايح جلاش وتدهن وتكرر الطبقات حتى تنتهي الكميه ثم تقطع بحرص الى مربعات وكل مربع نقطعه شكل مثلث  وترش حبه البركه وتدخل الفرن من 35-40 دقيقه حراره 200  من تحت وفوق لين يحمر و تكون مقرمشه
الحشوه: ( كوب جبن فيتا + نص كوب جبن موزريلا مبشور + ربع كوب زيت ذره + ربع كوب زيت زيتون +  4 كوب سبانخ مفرومه+ ربع كوب بقدونس مفروم + بصله بيضاء مفرومه + ملح وفلفل اسود )
تدهنين عجينه الجلاش ب: ربع كوب زيت ذره + ربع كوب زيت زيتون + بيضه + ربع كوب حليب سايل + ملح وفلفل اسود 


مموش ربيان طري...


تغسلين ربيان واتبلينه بكركم وثوم وعصير ليمون وخل وخليه ساعه ، بعدين فوحي الربيان شوي وحطي عليه  بهارات صحيحه وبصله مقطعه وثوم مدقوق وملح وكركم  ثم يصفى ويحفظ الماء للارز 
ثم نحمس بصل (كثري بصل ) بزيت لين يلين ثم الثوم والزنجبيل  وبهار جرام ماسالا ولومي وكمون وكركم ومعجون طماط ثم الربيان علي نار هاديه مع فلفل( اختياري) وشوي ماي يتسبك ثم كزبره وشبنت مفروم ،  نخلي ربع حمسه الربيان بالجدر  ونشيل ال 3/4  ثم نضيف الماش المجروش ( عدس اخضر) المنقوع والمصفى ونحرك ونضيف ماي الربيان وخل الماش يستوي نص استوا ثم الارز والماي فوق الارز ب 2 سم واذا نشف الماي خليه على نار هاديه وحطي باقي حمسه الربيان فوق العيش واتركيه لين ينضج ثم يقدم مع دقوس صبار 



الاثنين، 14 أكتوبر 2013

الوافل مع الايسكريم😃


تسخنين جهاز الوافل  على النار وانا شاريته من تافولا وتصبين فيه خليط الوافل وتخلينه ثلاث دقايق وبعدين تقلبين الجهاز الجهه الثانيه هم ثلاث دقايق وتقدمينه مع الايسكريم
المكونات: تضربين بالخلاط ثلاث بيضات لين تنفش  مع ملعقه طعام فانيلا سايله وبعدين ضيفي للخلاط 2 كوب طحين مع كوب وثلاثه ارباع كوب حليب  سايل مع اصبع زبده ( ميه جرام) مع ثلاث ملاعق شاي بيكنج بودر وملعقه شاي بيكربونات الصوديوم وربع ملعقه شاي ملح ونص كوب سكر 





كانيلوني بحشوه اللحم بالبينك صوص


تسلق  معكرونه الكانيلوني  في ماء مغلي مع ملح وزيت  لمدة 6-8 دقائق مو لازم تستوي  بس تطرى  وبعدين نشيلها  حبة حبة من الماء باستخدام  ملعقة كبيرة مخرمة  نصفيها من الماء ونضعها في صحن واسع ولا تخلونها فوق بعض كل حبه بروحها
الحشوة : حمسه اللحم المفروم او الدجاج المسحب من العظم اللي تسوونها.ثم ضيفي  جبنه موزريلا مبشوره  على الخلطه ونطفئ النار .. نحرك الخليط حتى تسيح الجبنة ثم نحشي بها مع معكرونه الكانيلوني
في صينيه الفرن نضع من الصلصه ثم نصف معكرونه الكانيلوني ثم باقي البينك صوص 
ثم نوزع جبن موزريلا مبشور واوريغانو( الزعتر البري) ودخليها الفرن تحت وفوق ولين يسيح الجبن وتحمر
طريقه البينك صوص( الصلصه الورديه) : 
تحمسين بصل مع ثوم مدقوق بزيت وتضيفين بهاراتج و وصلصله  باستا اومعجون الطماط وعلي نار هاديه يتسبك ثم تحطين كريمه خفق واحده و٣ملاعق جبن سائل وخليها شوي



سويسرول كيك بالآيسكريم

 خطوات قالب السويسرول كيك بالآيسكريم .، 
سويسرول كيك نقطعه شرايح ونوزعه باي شكل قالب تبين .. انا استخدمت ماعون  نص كروي وبطنته قصدير ، تصفين الكيك على قاعده الماعون ثم الجوانب فوق بعض وماراح اطيح ثم وزعي الايسكريم  ومايكون ذايب حيل  واذا تبين تشكلين بالالوان او لون واحد اللي تحبينه... ودخلينه الفريزر على الاقل ثلاث ساعات ثم تقلبين الماعون وتشيلين الماعون وبعدين القصدير ، ويقدم... 








حلوم مشويه

شرائح حلوم دائريه ( نقعيه بماي دافي دقايق علشان تخف ملوحته ) امسحيها بزيت زيتون وتشوينها وقدميها مع شرايح طماطم وزيتون وزعتر 

فاهيتا الربيان المكسيكيه

فاهيتا الربيان المكسيكيه
باستخدام علبه فاهيتا المكسيكيه ماركه MF
وفيها خبز التورتيلا وبهار وصلصه الفاهيتا الجاهزه ... استخدمت ربيان جامبو  وممكن لحم او دجاج شرائح بالطول ، نضع الربيان  في مقلاه فيها ملعقتين زيت وضفت له شويه كركم ونحركها ونخليها لين ينشف مائها ثم نضع شرائح الفلفل الملون والبصل لمده ٣ دقايق اولين ينضج الربيان وحطي شويه زيت ثم توابل الفاهيتا الجاهزه بالعلبه وخليه دقيقتين علي نار هادئه ثم يوضع الخلطه  في خبز التورتيلا وتضاف صلصه الفاهيتا الجاهزه بالعلبه وتقدم حاره مع  خبز وخس وجبن شيدر مبشور ... وتمتعي بالطعم الخطير👌😁



الدملوج

الدملوج...
بالعجانه نعجن: 3 كوب طحين ابيض منخول + 2 اصبع زبده ذائبه + 1/2 ملعقه كبيره بيكنج بودر + ملعقه كبيره سكر بودر + 1/2 ملعقه صغيره هيل + 1/2 ملعقه صغيره زعفران + 1/4 كوب خليط من ماء ورد وماء زهر + 1/2  كوب حليب سائل دافي ( ممكن ماء) 👈 تعجن بالعجانه لتتكون عجينه متماسكه وتغطى وتترك نص ساعه ترتاح ثم تقسم لكرات صغيره وتفرد على شكل قرص لسماكه قليله جدا ويوضع عود الشواء في ربع القرص ويطوى الجزء الاصغر على العود ثم يوزع مقدار ملعقه صغيره من الحشوه بشكل طوالي ثم تطوى العجينه بمساعده العود على شكل اسطوانه ثم يضغط على طرفي العجين الى الداخل ويسحب العود  ثم يحمر في زيت غزير وحار ويصفى ويرش بالسكر البودر
الحشوه؛ كوب جوز مفروم خشن + ملعقه صغيره هيل + ملعقه كبيره ماء ورد + ملعقه صغيره دارسين بودر+ شويه زعفران+ 4 ملاعق كبار سكر بودر ( تخلط الحشوه جيدا) 







الثلاثاء، 8 أكتوبر 2013

البيض بالطماطم


سخني الزيت وضيفي له بصلتين وثومه مفرومه و الفلفل البارد والحار مقطع مربعات او بدال الفلفل الحار معجون الفلفل ربع ملعقه صغيره ( اختياري الحار ) لين يصير لونه ذهبي ، أضيفي الأوريجانو والكمون والفلفل الاسود والملح ، وقلبيه لمدة دقيقتان .
وأضيفي 4 من الطماطم المقشره والمفرومة ومعجون الطماطم وربع كوب من الماء ، اتركيه ليغلي ثم خففي النار وقلبي الخليط لين يصبح كثيفا .
اسكبي الخليط في صينيه  للفرن ( أو اناء فخاري ) .
 اكسري البيضات الأربعة على الطماطم ثم أدخليه  الفرن واتركيه لمدة 10 – 20 دقيقة أو حتى ينضج البيض ، أخرجيه من الفرن ورشي عليه الكزبرة المفرومة 
وممكن بدال الفرن تخلينه في المقلاه وتضيفين البيض وتغطينه بغطاء لين ينضج


الجمعة، 4 أكتوبر 2013

صينيه الشيش طاووق ،، 👌


تحمسين بصله مقصص صغار مع ثومه مفرومه بالزيت ثم تضيفين قطع الشيش طاووق الجاهزه من الجمعيه وقطعيها حجم اصغر ثم ضيفي بهار (  فلفل اسود وكركم وجرام ماسالا وملح  وضيفي ملعقه معجون الفلفل الحار ( اختياري) ثم ضيفي جزر مبشور وكزبره مفرومه وخليه على نار هاديه لين ينضج ثم ضيفي عليه شوي من الصلصه البيضاء على الحشوه وحركي
بصينيه الفرن حطي بطاطس مقطع مكعبات ومقلي ثم حمسه الشيش طاووق ثم باقي الصلصه البيضاء ووزعي جبن موزريلا  مبشور ثم الفرن من فوق يحمر 
الصلصه البيضاء( واحد قيمر ( قشطه) الكبير مع ثلاث ملاعق جبن سايل )بالخلاط ... لذيذ





الخميس، 3 أكتوبر 2013

كبسه السمك

كبسه  السمك 
عقب مانغسل السمج ونملحه ونتبله بكركم وكاري وكمون وبهار سمج  نقليه بالزيت وبزيت القلي حمست بصل وثوم وزنجبيل وكزبره وشبنت ولومي وكركم وكمون وبهار سمج ونضيف الطماطم المقطع وحطيت العيش بعد ماصفيته فوق الحمسه وفوقه ماي ولما نقص ماي العيش هديت علي النار وحطيت فوقه السمج المقلي وتالي نقدمه،،، طعم العيش( الارز) لذيذ وجربوه 


فطيره القيمر( القشطه).

 عجينتي اللي معتمدتها للفطاير وخليه النحل 
 وعجينه فعلا ترفه وهشه ولذيذه واستخدمت طحين المطاحن للمعجنات المخمر( يعني فيه خميره ، لاتحطين خميره) 
وطريقه العجينه وسويت نص الكميه هي؛ 2 كوب طحين ابيض المخمر 2 ملعقه طعام سكر  وربع ملعقه طعام ملح و 1 كوب حليب سائل دافي وربع كوب زبده مذابه 

نعجنها بالعجانه ونخليها تخمر ساعه
نقسم العجينه الى كورتين كبار نفس الحجم وكره صغيره الحجم لعمل الشكل اللي تبينه وانا سويت شكل الجديله 💇 
 نفرد العجينه الاولى ونضعها  في صينيه مدهونه زيت ثم نوزع حبه البركه 
ثم نضع القيمر ( قشطه) عدد 2  طازج اطعم  ونوزعها على العجينه ولاتلامسين اطراف العجينه 
ثم نفرد العجينه الثانيه ونضعه على القيمر (القشطه ) ونثني الاطراف للداخل 
ثم ناخذ العجينه الصغيره  ونفردها ونقطعها بالطول رفيعه ونسوي منها جديله او اي شكل تحبونه  ونضعها على  اطراف العجينه 
ثم ندهنها الفطيره بصفار بيضه مخلوط بحليب ونوزع حبه البركه
وندخلها الفرن من تحت ثم من فوق  
واذا خلصت  نطلعها ونسقيها شيره او نستله او عسل  اللي تحبون